Ջասթին Բիբերի նմանակի դին գտել են Սան Ֆերնանդո հարթավայրի մոթելներից մեկի համարում։ Թոբիաս Շտրեբելը մահացել է 35 տարեկանում, այս տեղեկությունը հաստատել է նրա ներկայացուցիչը։
Տղամարդը հայտնի էր դարձել Թոբի Շելդոն անունով, մասնակցելով այն ռիելիթի շոուին, որտեղ մարդիկ փոխում են իրենց արտաքինը, որպեսզի նմանվեն իրենց կուռքերին։ Երիտասարդ Ջասթին Բիբերի պատճեն դառնալու նպատակով արդեն հասուն տղամարդը ծախսել է 100 հազար դոլար, հայտնում է «Կոմսոմոլսկայա պրավդան»՝ վկայակոչելով Deadline Hollywood-ին։
Նա ստիպված է եղել մի քանի վիրահատություն տանել, այդ թվում դեմքի մաշկի ձգման, մազերի պատվաստման, ռինոպլաստիկայի ու շրթերի կոռեկցիայի, նաեւ բոտոքսի բազմաթիվ ներարկումներ անել։
Շտրեբելի ներկայացուցչի խոսքով՝ ոստիկանությունը նրա մարմինը հանձնել է դիահերձման, բայց մահվան պատճառը դեռ հաստատված չէ։ Տղամարդը կորել էր օգոստոսի 18-ին։ Նրա դին հայտնաբերել են երեք օր հետո։