Նիդերլանդների անվտանգության խորհուրդը վերջնական զեկույց կհրապարակի հոկտեմբերի 13-ին Ուկրաինայի Դոնեցկի մարզում մալազիական «Բոինգի» ջախջախման վերաբերյալ:
Մասնագետները պիտի պատասխանեն ինքնաթիռի անկման պատճառների վերաբերյալ հարցին: Պատահածի համար մեղավորներին կպարզի մեկ այլ հետաքննություն, որն անցկացնում է Հոլանդիայի դատախազությունը գլխավոր քննիչ Ֆրեդ Վեստերբեկեի (Fred Westerbeke) գլխավորությամբ: Նրանց աշխատանքի արդյունքներն ակնկալվում են 2015 թվի ավարտին, հաղորդում է Lenta.ru-ն` վկայակոչելով Reuters-ին:
Զեկույցի նախնական տարբերակում, որը հրապարակվել է 2014-ի սեպտեմբերին, հաղորդվում է «կառուցվածքային վնասվածքների մասին, որոնք առաջացել են բազմաթիվ բարձրէներգետիկ օբյեկտների արտաքին ազդեցության հետեւանքով»: Մասնագետները ենթադրում էին, որ խոսքը «երկիր-երկինք» հրթիռի մասին է, որը կարող է արձակված լինել զենիթա-հրթիռային «Բուկ» համալիրի կողմից:
Malaysia Airlines ավիաընկերությանը պատկանող «Բոինգ-777»-ը, որը MH17 չվերթով Ամստերդամից Կուալա-Լամպուր էր թռչում, 2014-ի հուլիսի 17-ին ջախջախվել էր Դոնեցկի մարզում: Ինքնաթիռում եղած 298 հոգին զոհվել էին: