Օգոստոսի 27-ին Ֆինլանդիայի խորհրդարանի (Էդուսկունտա) նորանշանակ խոսնակ Մարիա Լոհելան ընդունել է Շվեդիայում եւ Ֆինլանդիայում ՀՀ դեսպան Արտակ Ապիտոնյանին։
Դեսպանը շնորհավորել է Լոհելային խոսնակի պատասխանատու պաշտոնին ընտրվելու կապակցությամբ եւ մաղթել հաջողություններ այդ առաքելության մեջ:
Հանդիպմանը քննարկվել են հայ-ֆիննական հարաբերությունների օրակարգային հարցեր, կարեւորվել է երկու երկրների միջեւ քաղաքական երկխոսության ընդլայնումը: Երկուստեք վստահություն է հայտնվել, որ հայ-ֆիննական հարաբերությունները առաջիկա տարիներին կշարունակեն իրենց վերընթաց զարգացումը, ինչի համար առկա են բոլոր նախադրյալները:
Մտքեր են փոխանակվել երկկողմ ձեւաչափով, ինչպես նաեւ տարբեր միջազգային հարթակներում Հայաստանի եւ Ֆինլանդիայի միջեւ միջխորհրդարանական կապերի ամրապնդման եւ խորացման վերաբերյալ։
Խոսնակի խնդրանքով դեսպանը ներկայացրել է Հայաստան-Եվրամիություն հարաբերությունները, իրավիճակը տարածաշրջանում, ԼՂ հակամարտության կարգավորման գործընթացի վերջին զարգացումները։
Օգոստոսի 28-ին դեսպան Ապիտոնյանը հանդիպել է նաեւ Ֆինլանդիայի ԱԳՆ պետքարտուղար Սամուլի Վիրտանենի հետ։ Քննարկվել են երկկողմ հարաբերություններին վերաբերող հարցերի լայն շրջանակ։