Հայաստանի մեծությամբ երկրորդ քաղաքում՝ Գյումրիում, Հայաստանի եւ Ռուսաստանի նախագահների մասնակցությամբ կայացել է «Պատվո բլուր» հուշահամալիրի բացումը։ Համալիրը նվիրված է 19-րդ դարի ռուս-թուրքական պատերազմներում զոհված 156 ռուս սպաների հիշատակին:
NEWS.am-ի թղթակցի հաղորդմամբ, նախագահները ծաղկեպսակ են դրել «Պատվո բլուրում»։ Հուշամալիրը հավերժացնում է իր մահացած ընկերների համար սգացող զինվորին՝ ձեռքը դրոշ, իսկ կողքին էլ արծիվ՝ թուրքական դրոշը ճանկերում։
Հայաստանի եւ Ռուսաստանի օրհներգերը հնչելուց հետո երկու պետությունների նախագահները ողջունել են միջոցառմանը ներկա հյուրերին, ինչպես նաեւ հյուրասեր գյումրեցիներին։ Նախագահները ելույթ ունենալուց հետո աղոթել են ռուս-թուրքական պատերազմի հետեւանքով մահացած ռուս զինվորների հոգու հանգստության համար։
«Պատվո բլուրը» զինվորական գերեզմանատուն է, որ ստեղծվել է 1856թ. Կովկասյան կորպուսի հրամանատար, գեներալ Նիկոլայ Մուրավյովի հրամանով: Հետագայում այդ տարածքում կառուցվել է Սուրբ Միխայիլի մատուռը: