«Եթե դուք փոխարինեք կենդանու մորը, հորը, նրա համար սնունդ հայթայթեք եւ պաշտպանեք վտանգից, կես տարին էլ բավական է, որպեսզի ձեր միջեւ իսկական ընկերություն ծնվի…»:
Ջերալդ Դարրել, «Կենդանաբանական այգի իմ բեռնախցում»
Երեւանի թաղամասերից մեկի սովորական բարձրահարկերից մեկի սովորական բնակարաններից մեկում, բնակիչներից բացի, փոքրիկ կենդանաբանական այգի է տեղավորվել: Սեփականատերը սիրողական կենդաբանաբան Էդիկն է, ով NEWS.am-ի թղթակցին ծանոթացրեց իր կենդանիներին, պատմեց նրանց պահելու դժվարությունների ու շփման հաճույքի մասին (ֆոտոռեպորտաժ):
Էդիկի ընտանիքի՝ մոր, հոր եւ կնոջ՝ Սիրանուշի հետ միասին, բնակարանում 2 բու, 2 իգուանա, 5 մողես, 2 նորկալեդոնիական գեկոն, 1 վիետնամական գեկոն, 9 քամելեոն, ավստրալական գորտ, 4 ավստրալական մորուքավոր ագամաներ, մողեսների բազմաթիվ այլ տեսակներ, 2 թութակ, վիետնամական ջունգլիներից սեւ կայսերական կարիճ, Լարիտանական Ամերիկայից սարդեր, մադագասկարյան խավարասերներ, կուբայական թռչող խավարասերներ, կատու եւ մուկ են բնակվում: Վերջինին Էդիկը տուն է բերել՝ բվերին կերակրելու համար, բայց կարեկցել է ու պահել: Ի դեպ, կատուն միակն է, ով չցանկացավ լուսանկարվելու համար կեցվածք ընդունել:
Էդիկը կենդանաբանության հետ անմիջական որեւէ կապ չունի: «Սա դեռեւս դպրոցական տարիներից սկիզբ առած հետաքրքրություն է: Մանկությունից տանը կենդանիներ եմ պահել»,- պարզաբանեց նա: Ընտանիքի անդամներն ըմբռնումով են մոտենում: «Եթե չհաշվենք, որ երբեմն ցանկանում են խեղդել ինձ, բայց՝ ոչ կենդանիներին»,- կատակում է Էդիկը:
Խոհանոցում բնակվում է ձեռնասուն Փարավոն քամելեոնը: «Սա հատուկ Ֆարիկի համար է»,- Էդիկի մայրը ցույց է տալիս պատի երկայնքով անցկացրած ճոպանը, որի վրայով ճամփորդում է քամելեոնը: Հյուրասիրությունից՝ խավարասերի տեսքով, Փարավոնը հրաժարվեց, ուշադրությունը կենտրոնացնելով անկոչ հյուրերի ուղղությամբ:
«Իրականում այսքան կենդանի պահելը դժվար է եւ ծախսատար, նաեւ շատ ժամանակ է պահանջում»,- ասում է Էդիկը: Օրական միայն սննդի համար մի քանի հազար դրամ է անհրաժեշտ: Դժվար է նաեւ աքսեսուարներ գնելը, հատկապես՝ ուլտրամանուշակագույն լամպեր, որոնք ձմռանը կենսական անհրաժեշտություն են մողեսների համար:
«Այդ պատճառով ցանկանում ենք կրճատել կենդանիների թիվը»,- նշում է Էդիկը: Ագամաներն ու քամելեոններն Էդիկի սիրելիներն են. նրանցից բաժանվել չի պատրաստվում:
Սողունների մեծ մասին Էդիկը ձեռք բերել Հայաստանից հեռացած մեկի անձնական հավաքածուից: Հայաստանում ընդամենը մի քանի այդպիսի հավաքածու կա: