Իրանի նախագահ Հասան Ռոհանին Մերձավոր Արեւելքի երկրներին կոչ է արել միավորել իրենց ուժերը ահաբեկչության դեմ պայքարելու համար։ Այս մասին նա հայտարարել է Թեհրանում ահաբեկչական ակտերից զոհված 17 հազար իրանցիների հիշատակին նվիրված 2-րդ միջազգային կոնգրեսի ժամանակ։
«Ես տարածաշրջանի բոլոր երկրներին կոչ եմ անում միավորել ջանքերը մտավոր, քաղաքական եւ իրավական համագործակցության համար»,- հայտարարել է Ռոհանին, փոխանցում է Մեհր գործակալությունը։
Նախագահի խոսքով՝ այդ պլանում պետք է դիտարկվեն ահաբեկչության առաջացման արմատական պատճառները, որոնք թաքնված են տգիտության, կողմնակալության, ծայրահեղականության, աղքատության, զարգացման բացակայության եւ բռնապետական ու գաղութարար քաղաքականության հետեւում։ Ռոհանին հույս է հայտնել, որ միջպետական կոալիցիային միանում են քաղաքական եւ սոցիալական կազմակերպություններ եւ տարածաշրջանի երկրների ինստիտուտներ, գրում է ՏԱՍՍ-ը։
Նախագահը նշել է նաեւ, որ ահաբեկչությունը վերածվել է գործիքի, որից օգտվում են ծայրահեղականները իրենց տարբեր նպատակներին հասնելու համար։
Ռոհանին նաեւ սուր քննադատության է ենթարկել միջազգային հանրությանը՝ նրան մեղադրելով նման կարեւոր, վտանգավոր, սարսափազդու հարցում պասիվ լինելու մեջ։
«Ահաբեկիչներին աջակցելով՝ որոշ տարածաշրջանային մուսուլմանական երկրներ այդպիսով կիսում են ահաբեկիչների գործած հանցագործությունների պատասխանատվությունը։ Կասկած չկա, որ ահաբեկչությունը վաղ թե ուշ շուռ կգա այդ պետությունների դեմ»,- հավելել է նախագահը։
Ռոհանին նաեւ ասել է, որ Իրանը կշարունակի աջակցել Իրաքին, Սիրիային, Լիբանանին, Պակիստանին, Աֆղանստանին եւ Եմենին՝ պայքարելու ծայրահեղականների դեմ։
