Հայաստանի Մարդու իրավունքների պաշտպանի գրասենյակը շարունակում է զբաղվել «Ներազգային ազատագրական շարժում» նախաձեռնության ղեկավար Վահան Մարտիրոսյանի գործով: Այս մասին օգոստոսի 31-ին ՀՀ կառավարության նիստից հետո լրագրողներին հայտնեց Մարդու իրավունքների պաշտպան Կարեն Անդրեասյանը:
Նա նաեւ հավելեց, որ դատախազությունն արդեն հրապարակել է գործի նյութերը եւ բավական մանրամասն: «Հարկ է նկատել, որ դատախազության հետ մենք ոչ միշտ ենք համաձայնում: Բայց հիմա արդեն բավական տվյալներ ունենք»,- հայտարարեց Անդրեասյանը:
Հիշեցնենք, որ օգոստոսի կեսերին հաղորդագրություն տարածվեց նաեւ այն մասին, որ «Ներազգային ազատագրական շարժում» նախաձեռնության ղեկավար Վահան Մարտիրոսյանն ու նրա կինն իրենց տան մոտ ծեծի էին ենթարկվել: NEWS.am-ի թղթակցի հետ զրույցում Մարտիրոսյանը հայտարարել էր, որ իրենց ծեծել են պատգամավոր Մհեր Սեդրակյանի թիկնապահները:
