Երեւանի Մարգարյան փողոցի իր բնակարանում այսօր` օգոստոսի 31–ին, մահացած հայտնաբերված 52–ամյա Վահան Աղաջանյանին սպանել են մի քանի օր առաջ ու թողել բնակարանում: Այս մասին NEWS.am-ին հայտնեցին սպանվածի հարեւանները` նշելով, որ իրենց այդ մասին ասել են ոստիկանները։
Նրանց խոսքով՝ սպանվածն ապրում էր միայնակ, ամուսնացած է եղել մի քանի անգամ: Ունի երկու երեխա, որոնք բնակվում են Արմավիրում: Հարեւանների խոսքով` Վահան Աղաջանյանը չարաշահում էր ալկոհոլը, պարտքեր կուտակում։
«Տաքսիներով Հոկտեմբերյան էր գնում, երբ գալիս էր, մտնում տուն` թե փողը բերեմ, ու դուռը փակում էր, փողը չէր տալիս»,- պատմեցն հարեւանները` նշելով, որ նրան մի քանի անգամ ծեծի են ենթարկել:
Վերջին ամիսներին Վահան Աղաջանյանը սկսել էր տաքսի վարել, սակայն մասնագիտությամբ ատամնաբույժ էր, բուժում էր հարեւանների ատամները։
Հարուցվել է քրեական գործ՝ ՀՀ քր.օր.-ի 104 հոդվածի 1-ին մասի (սպանություն) հատկանիշներով: Ոստիկանությունն աշխատանքներ է իրականացնում հանցագործությունը կատարողին հայտնաբերելու ուղղությամբ:
Ավելի վաղ NEWS.am-ը հաղորդել էր, որ Մարգարյան փողոցի թիվ 41 շենքի 2-րդ մուտքի 1-ին հարկի մեկ սենյականոց բնակարանում օգոստոսի 31–ին` ժամը 11:30-ի սահմաններում, ոստիկանները հայտնաբերել են սուր կտրող-ծակող առարկայից ստացած վնասվածքներից մահացած 52-ամյա Վահան Աղաջանյանի դին: