Ռոստովի մարզում հետաքննում են 22-ամյա հայի վայրագ սպանության գործը: Ռուսական Առաջին ալիք-ի հաղորդմամբ, հետաքննության տեղեկություններով, երիտասարդին մահացու ծեծել են համագյուղացիներն այն բանից հետո, երբ նա իր ավտոմեքենայով դիպել է ուրիշ մեքենայի:
Դաժան ծեծին մի քանի տասնյակ մարդ է ականատես եղել, որոնք տեղի ունեցածն ավելորդ դաժանություն են կոչում: Ռաֆայել Խալղաթյանի հուղարկավորությանը գյուղի կեսը մասնակցել է:
Ոստիկանության վարկածով, կիրակի երիտասարդը կորցրել է մեքենայի կառավարումը եւ հարվածել կայանված մեքենաներին, ինչի համար էլ ծեծի է ենթարկվել: Վնասված մեքենաների տերերի անձը հաստատվել է, բոլորն էլ Սինյավսկոե գյուղի բնակիչներ են:
Առայժմ, սակայն, հայտնի չէ, թե ով է ծեծել երիտասարդ հային եւ նրա հորը: Այստեղ չեն բացառում, որ դա կարող էին անել գյուղի տոնի առիթով ժամանած հյուրերը:
Ռոստովի մարզի Քննչական կոմիտեն տեղեկացրել է, որ կասկածյալների շրջանակը հստակեցվել է: Միջադեպի բոլոր մասնակիցներին հարցաքննում են: Հարուցվել է քրեական գործ՝ «Առողջությանը կանխամտածված վնաս հասցնելը, որն անզգուշաբար հանգեցրել է մահվան» հոդվածով: Քննիչները կարծում են, որ մահացու հարվածը մի մարդ է հասցրել, որի ինքնությունը փորձում են հաստատել:
