Սահմանադրական բարեփոխումների դեմ սկսված արշավից իշխանությունները չեն վախենում: Այս մասին այսօր՝ սեպտեմբերի 1-ին, լրագրողների հետ զրույցում ասաց ԱԺ նախագահ Գալուստ Սահակյանը:
«Ինձ մտահոգում է բարեփոխումների դեմ ասվող «ոչ»-ը, ոչ թե բարեփոխումների դեմ սկսված արշավը, որովհետև տարիների ընթացքում մի կերպ ամրապնդվեց, թե ընդդիմությունն ինչ բան է, հիմա հասարակությունը պետք է կարողանա հասկանալ նաև, թե «ոչ»-ն ինչ բան է»,-ասաց ԱԺ նախագահը:
Գալուստ Սահակյանի խոսքով՝ հասարակության հետ ամենաշատը ՀՀԿ-ն է շփվում, բայց «Երևանի ասֆլտի վրա քաղաքական գործունեություն ծավալողները» անընդհատ ժողովրդի անունից հայտարարություններ են անում:
«Ժողովրդին պետք է հանդիպել, հասկանալ նրա կարծիքը, և սեփական կարծիքը երբեք պետք չէ թելադրել նրան: Հաղթում ենք մենք և դժգոհում են մեզանից, իսկ երբ հաղթեն մեզ, ուրիշներն էլ կբողոքեն իրենցից»,-ասաց Գալուստ Սահակյանը:
Գալուստ Սահակյանը նշեց, որ այժմ կա կայուն մեծամասնության ձևավորման անհրաժեշտություն, քանի որ եթե ԱԺ-ում կայուն մեծամասնություն չի լինում, անընդհատ կառավարություն է փոխվում:
«Ինչքան խորանում, տեսնում ենք, որ նորից հնարավոր է կայուն մեծամասնության ճանապարհով գնալ, բայց կան տարբեր մոդելներ: Վենետիկի հանձնաժողովն էլ կմտածի, այստեղ էլ քննարկումների ընթացքում կգանք համաձայնության, ինձ թվում է»,-ասաց ԱԺ նախագահը: