Աչաջուրի գյուղապետ Կամո Ղալթախչյանի փաստաբան Լիպարիտ Սիմոնյանի համար անհասկանալի է, թե ինչու իր պաշտպանյալի մահափորձով մեղադրյալ չկա, մինչդեռ իրենք ապացույցներ ունեն, թե ով է պատվիրել եւ կատարել մահափորձը:
NEWS.am-ի թղթակցի հետ զրույցում փաստաբանը հայտնեց, որ իրենք նախաքննական մարմնին ներկայացրել են բոլոր ապացույցները դեպքի վերաբերյալ:
«Կարծում եմ՝ քննիչներն անուղղակի շահագրգռվածություն ունեն: Մենք ներկայացրել ենք բոլոր ապացույցները, սակայն գործով ոչ մեկին մեղադրանք չի առաջադրվել: Հակառակը, քննչական մարմինները կալանավորել են 4 անձի, որոնք մեղադրվում են Մեխակ Մելիքբեկյանին առեւանգելու մեջ»,- ասաց փաստաբանը:
Հիշեցնենք, որ Մեխակ Մելիքբեկյանն այն անձն է, որը, ըստ Ղալթախչյանների, կատարել է մահափորձը:
Լիպարիտ Սիմոնյանի խոսքով՝ ինքը դիմել է գլխավոր դատախազությանը, իր պաշտպանյալներից Գագիկ Ալավերդյանն էլ առերես ճանաչել է մահափորձի անմիջական կատարողին եւ առեւանգողին: Սակայն, քննչական մարմինը մեղադրանք չի առաջադրում նրանց. «Տեղեկություններ կան, որ գործն այս պահին գտնվում է գլխավոր դատախազությունում: Թե ինչ հիմքով, հայտնի չէ:
Նշենք, որ ըստ Քննչական կոմիտեի տարածած հաղորդագրության՝ Սաշա Ղալթախչյանը Տավուշի մարզի Աչաջուր գյուղի բնակիչներ Գագիկ Ալավերդյանի, Հովհաննես Ղալթախչյանի եւ մի խումբ այլ անձանց հետ 2015թ. հունվարի 17-ին առեւանգել է Մեխակ Մելիքբեկյանին, որին տեղափոխել է Տավուշի մարզում գտնվող «Ջողազ» կոչվող վայր, ծեծի ենթարկել նրան եւ պահանջել խոստովանել, թե իբր ինքն է կատարել Տ.Գասպարյանի կազմակերպած մի շարք ծանր հանցագործությունները, այդ թվում՝ Աչաջուրի գյուղապետ Կամո Ղալթախչյանի նկատմամբ 2013թ. սեպտեմբերի 22-ին տեղի ունեցած սպանության փորձը։
Չորս երիտասարդներին էլ մեղադրանք է առաջադրվել եւ խափանման միջոց է ընտրվել կալանավորումը:
Հիշեցնենք, որ Աչաջուրի գյուղապետ Կամո Ղալթախչյանի դեմ սպանության փորձը կատարվել է 2013թ.-ին, իսկ գործով ձերբակալված անձն էլ քննիչներին հայտնել է, որ գյուղապետն ու մի շարք անձինք իրեն առեւանգել են եւ ստիպել, որ սպանության փորձն իր վրա վերցնի: Այս դեպքով երկու քրեական գործ կա հարուցված: