Ազգային ժողովի ԲՀԿ խմբակցությունն այսօր՝ սեպտեմբերի 1-ին Սահմանադրական բարեփոխումների մասնագիտական հանձնաժողովի անդամների հետ քննարկել է մասնագիտական-իրավական հարցեր՝ կապված նախագծի հետ: Այս մասին NEWS.am-ի թղթակցի հետ զրույցում նշել է ԱԺ ԲՀԿ խմբակցության պատգամավոր Միքայել Մելքումյանը:
«Քննարկել ենք հարցեր՝ կապված ընտրիչների ժողովի հետ, հակակշիռների ինստիտուտի, դատավորների նշանակման մեխանիզմների, նախագահի ընտրության հետ: Շատ հարցեր ենք քննարկել, ընդհուպ մինչեւ օրենքով նվազագույն աշխատավարձի սահմանման հարցերը: Բազմաթիվ հարցեր ներկայացրել ենք, պայմանավորվել ենք նաեւ, որ գրավոր կտանք այդ հարցադրումները մինչեւ սեպտեմբերի 14-ը կայանալիք լսումները»,- նշեց պատգամավորը:
Հարցին, թե խմբակցությունների հետ այս քննարկումները կարող են փոփոխությունների հանգեցնել Սահմանադրության ներկայացված նախագծում, Մելքումյանը պատասխանեց. «Գիտեք ինչ, կա իրավական-մասնագիտական քննարկում, եւ կա քաղաքական դիրքորոշում հայտնելու հարց: Հիմա մենք մասնագիտական հարցերը կքննարկենք, իսկ վերջնական որոշումը կկայացնի ԲՀԿ քաղաքական խորհուրդը: Հիմա պետք է քննարկենք, մտահոգությունները տեսնենք: Օրինակ, այնտեղ միասեռ ամուսնությունների խնդիր էլ կա, ինքնաբուխ հավաքների, տարբեր հարցեր կան»:
Պատգամավորը նշեց, որ ԲՀԿ-ն դեռ վերջնական որոշում չունի Սահմանադրության նախագծի վերաբերյալ, որոշումը կայացնելու է ԲՀԿ քաղխորհուրդը. «Ժամանակ դեռ ունենք»:
Նշենք, որ հանձնաժողովի անդամներն արդեն հանդիպել են ՀՀԿ, «Ժառանգություն» եւ ՀՅԴ խմբակցությունների հետ: ՀԱԿ-ը, ըստ տեղեկությունների, հրաժարվել է հանդիպել:
Հիշեցնենք, որ Սահմանադրության նոր նախագիծն արդեն ուղարկվել է Ազգային ժողով: Աշնանային նստաշրջանի առաջին քառօրյային սկսվելու է քննարկումը: Նախատեսվում է, որ արդեն աշնան վերջին կլինի նոր նախագծի հանրաքվեն:
