Lamborghini ընկերության էքստրեմալ սուպերմեքենան, որը թողարկվելու է 2016թ., ստանալու է Centenario LP770-4 V12 անվանումը: Նորույթի թողարկումը նվիրելու են իտալական ապրանքանիշի հիմնադիր Ֆերուչչո Լամբորգինիի հարյուրամյակին, նա ծնվել է 1916թ. ապրիլի 28-ին: Այդ մասին հայտնել է ֆրանսիական TF1 հեռուստաալիքը:
Կուպեն ստեղծելու են Aventador – LP750-4 SV (SuperVeloce) մեքենայի հիման վրա, որի քաշը կազմում է 1525 կգ: Ըստ տեղեկությունների՝ Centenario LP770-4 V12-ը կունենա նույն, 6,5 լիտր աշխատանքային ծավալով շարժիչը, բայց ձիաուժը 750-ից կհասնի 770-ի:
Նախնական տվյալներով, մեքենան 100 կմ/ժամ արագությունը կհավաքի 2,7 վայրկյանում: Առավելագույն արագությունը կազմելու է 350 կմ/ժամ:
Մեքենայի հրապարակային ցուցադրությունը կայանալու է Ժնեւի ավտոսրահում, 2016թ. մարտին: Մեքենան թողարկելու են 20 օրինակով, յուրաքանչյուրը 1 մլն եվրո արժեքով:
