Ֆրանսիայում միգրանտների զանգվածային հոսքին վերաբերող օրհասական իրադրությունը ամբողջովին դուրս է եկել վերահսկողությունից: Նման տեսակետ է արտահայտել «Ազգային ճակատ» կուսակցության ղեկավար Մարին Լե Պենը:
«Ներգաղթը վերահսկողությունից դուրս է եկել: Կառավարությունը բացարձակապես ունակ չէ կարգավորել անլեգալ ներգաղթի խնդիրը»,- ասել է նա LCI հեռուստաալիքի եթերում:
Բացի դրանից, համարում է Լե Պենը, ֆրանսիայի իշխանությունները այս խնդիրը լուծելու «կամք չունեն»:
Ինչպես հիշեցրել է քաղաքական գործիչը, ով երկար ժամանակ աշխատել է միգրացիոն ճգնաժամի էպիկենտրոնում հայտնված Նոր-Պա-դե-Կալե ռեգիոնի տեղական իշխանության մարմիններում, միգրանտների հոսքի խնդիրը լուծելու բոլոր նախկին փորձերը ապարդյուն են եղել:
«Կառուցում էին ճամբարներ, քանդում, նորից կառուցում ... Բայց խնդիրն այն է, որ մենք չենք վերահսկում մեր սեփական սահմանները: Եվ դրա պատճառով էլ կգան եւս տասնյակ , հարյուր հազարավոր մարդիկ»,- վստահ է նա, հայտնում է «ՏԱՍՍ»-ը:
Մեկնաբանելով իրավիճակը Կենտրոնական եւ Արեւելյան Եվրոպայի երկրներում, որոնք ինչպես պարզվում է ՝ բացարձակապես պատրաստ չեն Բալկաններով եկող վերաբնակների զանգվածային հոսքերին, Մարին Լե Պենը հերթական անգամ ընդգծել է, որ այդ ամենի պատճառը ներեվրոպական սահմանների վերացումն է: «Շնորհակալություն Եվրամիությանը,շնորհակալություն Շենգենին, -նկատել է նա,- Շնորհակալություն ԵՄ-ին ՝ սահմանների համատարած բացման համար, որով յուրաքանչյուր երկրի արգելվում է իր սեփական սահմանն ունենալ ու վերահսկել այն»:
Լե Պենի գնահատականով ՝ երրորդ աշխարհի երկրներից ժամանող հազարավոր միգրանտներին ապաստան տրամադրելու քաղաքականությունը, որը վարում են ԵՄ առաջատար երկրները, արմատապես արատավոր է ու հանգեցնելու է իրավիճակի բարդացմանը: «Մենք այսօր արդեն կանգնած ենք միգրացիոն ջրհեղեղի առջեւ: Եվ ամեն անգամ, երբ մեկ անլեգալի օրինական կարգավիճակ ենք տրամադրում, դրանով ազդանշան ենք տալիս 10 ուրիշների, ովքեր ուզում են անօրինական ճանապարհով ժամանել ֆրանսիական տարածք»,- ասել է նա: