Երեւանի քաղաքապետ Տարոն Մարգարյանը ՀՀ պաշտպանության նախարար Սեյրան Օհանյանի, Հայաստանի ազգային հերոս, Արցախյան ազատամարտի նահատակ Թաթուլ Կրպեյանի ընտանիքի անդամների եւ բազմաթիվ բնակիչների հետ միասին մասնակցել է Թաթուլ Կրպեյանի անվան զբոսայգու հանդիսավոր բացմանը:
Նոր Նորք վարչական շրջանի Գայի պողոտայի եւ Լվովյան փողոցի հատման տարածքին հարակից նոր զբոսայգին կառուցվել է Երեւանի համայնքային 2014թ. ծրագրերի շրջանակներում։ Թաթուլ Կրպեյանի անվամբ նորակառույց զբոսայգին անվանակոչվել է Երեւանի ավագանու 2015թ. մարտի 18-ի N299-Ն որոշմամբ:
Հանդիսավոր արարողության շրջանակում Երեւանի քաղաքապետն ու ՀՀ պաշտպանության նախարարը հարգանքի տուրք են մատուցել Հայոց ազատամարտի նահատակների հիշատակին, ծաղիկներ խոնարհել այգում ամփոփված ազատամարտիկների շիրիմներին: Քաղաքապետ Տարոն Մարգարյանի նախաձեռնությամբ կյանքի կոչված ծրագրի շրջանակում շուրջ 5,64 հա ընդհանուր մակերեսով այգում ապահովվել են լիարժեք հանգստի կազմակերպման համար անհրաժեշտ բոլոր պայմանները:
Երեւանի Նոր Նորք վարչական շրջանի ղեկավարի նախաձեռնությամբ այգու մի հատվածում հանդիսավորությամբ բացվել է նաեւ 2014թ. նոյեմբերի 12-ին խոցված ԼՂՀ ՊԲ ՄԻ-24 ուղղաթիռի անձնակազմի հիշատակին նվիրված հուշարձանը:
