Քննչական կոմիտեն նոր մանրամասներ է հայտնել սեպտեմբերի 1-ի լույս 2-ի գիշերը տեղի ունեցած երկու երիտասարդների դանակահարության մասին:

Պարզվել է,  որ սեպտեմբերի 1-ին՝ ժամը 19:00-ի սահմաններում, Բյուրեղավան քաղաքի 17-ամյա բնակիչը ծեծի է ենթարկել Գ.Ստեփանյանին, որից հետո՝ ժամը 20:30-ի սահմաններում, հիշյալ վիճաբանության շուրջ առաջացած փոխհարաբերությունները պարզաբանելու նպատակով նրան են հանդիպել  Գ.Ստեփանյանը եւ վերջինիս եղբայրներ Ռ. եւ Ա. Ստեփանյանները:

Տղաների միջեւ սկսվել է ծեծկռտուք, որի ընթացքում 17-ամյա երիտասարդն իր մոտ եղած դանակով դիտավորությամբ հարվածներ է հասցրել Ռ.եւ Ա.Ստեփանյանների մարմնի տարբեր մասերին, որի արդյունքում վերջիններս դեպքի վայրից հեռացել են, եւ վեճը դադարել է:

Առերեւույթ հանցագործություն կատարելու կասկածանքով 17-ամյա երիտասարդը ձերբակալվել է:

Նշանակվել են դատաբժշկական, դատակենսաբանական եւ դատահետքաբանական փորձաքննություններ:

Ավելի վաղ NEWS.am-ին ոստիկանության լրատվական ծառայությունից հայտնել էին, որ Բյուրեղավանի բժշկական կենտրոնից ահազանգ է ստացվել, որ սուր կտրող-ծակող առարկայից ստացած մարմնական վնասվածքներով իրենց մոտ են տեղափոխվել 2 երիտասարդներ:

Պարզվել է, որ վիրավորները Բյուրեղավանի բնակիչներ, 25-ամյա Ռոման եւ 26-ամյա Արմեն Ստեփանյաններն են: