Վերջին ժամանակահատվածում ադրեջանական կողմը շփման գծում սկսել է հեռահար միջոցներ կիրառել։ Այս մասին այսօր` սեպտեմբերի 2–ին, լրագրողներին ասաց ՀՀ պաշտպանության նախարար Սեյրան Օհանյանը` ընդգծելով, որ դրա պատճառը հակառակորդի ձախողումներն են։
«Վերջին շրջանում շփման գծի լարվածության առանձնահատկություններից մեկն այն է, որ հակառակորդն սկսել է ականանետեր կիրառել։ Իհարկե, դրանք անպատասխան չեն մնում, պատժվում են։ Շատ դեպքերում կանխարգելիչ միջոցառումներով զսպման համապատասխան պայմաններ ենք ստեղծում։ Հակառակորդը հաջողությունների չի հասնում, դրա համար էլ գործի է դնում հեռահար միջոցները»,– ասաց նախարարը` վստահեցնելով, որ իրավիճակը սահմանին վերահսկելի է։
Անդրադառնալով նախօրեին Տավուշի սահմանին հակառակորդի գնդակոծության հետեւանքով վիրավորված երկու ժամկետային զինծառայողներին` նախարարն ասաց, որ երկուսի վիճակն էլ կայուն է։
Ավելի վաղ NEWS.am-ը հայտնել էր, որ ադրբեջանական կողմը սեպտեմբերի 1-ին մի քանի ժամ գնդակոծել է Տավուշի մարզի սահմանամերձ Այգեպար և Չինարի գյուղերը: Պաշտպանության նախարարության մամուլի քարտուղար Արծրուն Հովհաննիսյանը հայտնել է, որ կա երկու վիրավոր՝ ժամկետային զինծառայողներ 19-ամյա Վլադիմիր Արամի Գեւորգյանը, եւ 22-ամյա Գոռ Համբարձումի Գեւորգյանը: