Ֆրանսիացի ագարակատերերը, որոնք դժգոհ են գյուղատնտեսական ոլորտի ճգնաժամը կարգավորելու հարցում իշխանությունների անկարողությունից, պատրաստվում են կաթվածահար անել երթեւեկությունը Ֆրանսիայի մայրաքաղաքում: Այս պահին տրակտորների եւ այլ դաշտային տեխնիկայի շարասյուները ուղեւորվել են այնտեղ, որպեսզի հինգշաբթի օրը փակեն հիմնական ճանապարհները, հայտնում է «ՏԱՍՍ»-ը:
Ագարակատերերը Փարիզ են ճանապարհվել ամբողջ երկրից ՝ Բրետանից, Նորմանդիայից, Ակվիտանիայից, Բուրգունդիայից ու Ֆրանսիայի կենտրոնական շրջաններից: Բողոքի ակցիային մասնակցում է ավելի քան 1.5 հազար տրակտոր: Շուրջ 5 հազար մարդ էլ Փարիզ կգա ավտոբուսով կամ գնացքով:
Նշենք, որ սա նրանց առաջին բողոքի ակցիան չէ: Ամռան կեսերին անասնաբուծական տնտեսությունների վրդովված տերերը բավականաչափ խնդիրներ պատճառեցին իշխանություններին: Ագարակատերերը տրակտորները դուրս էին բերել տրանսպորտային հիմնական մայրուղիներ ու դժվարացրել երթեւեկությունը: Տարբերությունը միայն այն է, որ մինչ այդ տուժել էին ռեգիոնալ կենտրոնները ՝ Կանը, Բորդոն, Լիոնը, Տուլուզան:
Իսկ հիմա գյուղատնտեսական արտադրողները հասել են Փարիզ:
