Ռուսաստանի տարբեր շրջաններում սեպտեմբերի 3-ին տեղի կունենան 11 տարի առաջ Հյուսիսային Օսիայի Բեսլան քաղաքում ահաբեկչության զոհերի հիշատակին նվիրված միջոցառումներ։ Ռուսաստանում հիշելու են Բեսլանի եւ մյուս ահաբեկչությունների զոհերին։ Մայրաքաղաք Մոսկվայում՝ Սուրբ Աստվածածնի ծննդյան տաճարի դիմաց, հիշատակի հավաք տեղի կունենա։ Նույն օրը հիշատակի երթեր տեղի կունենան ՌԴ մայրաքաղաքի այն վայրերում, որտեղ ահաբեկչություններ են տեղի ունեցել, գրում է ՏԱՍՍ-ը։

Հիշեցնենք, որ Բեսլանի ահաբեկչությունը տեղի էր ունեցել 2004թ. սեպտեմբերի 1-ին։ Ահաբեկիչները գրավել էին № 1 միջնակարգ դպրոցը եւ 3 օր շարունակ պատանդ պահել ուսուցիչներին, դպրոցականներին եւ նրանց ծնողներին։

Գերիներին պահում էին դպրոցի ականապատ մարզադահլիճում՝ առանց ջրի եւ ուտելիքի։ Ահաբեկչությանը զոհ էր գնացել 334 մարդ, որոնց թվում՝ ավելի քան 180 երեխա։ Ահաբեկչության հետեւանքով հաշմանդամ է մնացել 126 մարդ, որոնց թվում՝ 70 երեխա։