Դաժան ծեծի ենթարկված՝ «Պանտերա» անվտանգության ծառայության հերթափոխի պետ Վարազդատ Խոցանյանը վիրահատվել է: Այս մասին NEWS.am-ի թղթակցին հայտնեցին Մ.Հերացու անվան թիվ 1 համալսարանական կլինիկայից:
Նրանց փոխանցմամբ՝ Խոցանյանի վիճակը կայուն է, հետվիրահատական շրջանում է գտնվում, բարդություններ չկան: Նշենք, որ բժիշկները վիրահատելու համար մի քանի օր սպասել են, մինչեւ որ Խոցանյանի վիճակը կայունանա:
Հիշեցնենք, որ Երեւանում 2015թ. օգոստոսի 20-ի լույս 21-ի գիշերը ժամը 03.30-ի սահմաններում, հարձակվել եւ ծեծի են ենթարկել «Պանտերա» անվտանգության ծառայության հերթափոխի պետ Վարազդատ Խոցանյանին: Դեպքը տեղի է ունեցել Ալեք Մանուկյան փողոցում գտնվող «Մուզ կաֆե» սրճարանի մոտ, երբ անվտանգության ծառայության աշխատակիցը գնում էր «Տոտոյի» գրասենյակ՝ ստուգայցի:
Սեպտեմբերի 3-ին Հատուկ քննչական ծառայությունում մի խումբ անձանց կողմից դիտավորությամբ Վարազդատ Խոցանյանի առողջությանը միջին ծանրության վնաս պատճառելու դեպքի առթիվ հարուցվել է քրեական գործ ՀՀ քրեական օրենսգրքի 113-րդ հոդվածի 2-րդ մասի 3-րդ կետով:
Նախնական տեղեկություններով՝ Խոցանյանին ծեծի է ենթարկել «Զվարթնոց» օդանավակայանի բաժնի նախկին պետ, ոստիկանության գնդապետ Վանիկ Թանգամյանի որդին: