Գվատեմալայի նախագահ Օտտո Պերես Մոլինան հրաժարական է տվել այն բանից հետո, երբ դատարանը նրան կալանավորելու օրդեր է տվել։
Դատախազությունը նախագահին մեղադրում է կոռուպցիոն սխեմային մասնակցելու համար, որը բյուջեին միլիոնավոր դոլարների վնաս է հասցրել։
Օրդերի հիման վրա նախագահը պարտավոր է ներկայանալ դատախազություն ցուցմունք տալու համար։ Դրանից հետո նրան կալանքի տակ թողնելու կամ ազատ արձակելու մասին որոշում է կայացվելու։
Քննության տեղեկություններով՝ Պերես Մոլինան եւ այլ բարձրաստիճան պաշտոնյաներ տոկոսներ են ստացել այն կաշառքներից, որոնք գործարարները վճարել են մաքսատանը՝ ներկրվող ապրանքների հարկերից խուսափելու համար, հայտնում է BBC-ի Ռուսական ծառայությունը։
Նախագահը հերքում է իր հասցեին հնչած բոլոր մեղադրանքները։