Հայաստանում ինտերնետ-տիրույթի հարցերին նվիրված համաժողով կանցկացվի: «Հայաստանի ինտերնետ հանրություն» կազմակերպության փոխնախագահ Գրիգոր Սաղյանը NEWS.am-ի թղթակցին տեղեկացրեց, որ ArmIGF համաժողովը կանցկացվի Երեւանում, սեպտեմբերի 7-8-ին:
Օրակարգային հարցերից մեկը ոչ լատինատառ դոմենների գրանցումն է լինելու: «Ցանկանում ենք հասկանալ, արդյո՞ք այդ հարցը մեծ հետաքրքրություն է ներկայացնում, մասնավորապես, Հայաստանում»,- պարզաբանեց Սաղյանը:
Համաժողովում քննարկվելու են նաեւ համացանցի օգտագործման անդրսահմանային իրավունքի հարցերը, մասնավորապես, արտասահմանյան առցանց-խաղատների օգտագործման թույլտվությունը եւ այն, թե որքանով է նպատակահարմար դրանց հասանելիությունը Հայաստանից արգելափակելը:
Հայ մասնակիցներից բացի, համաժողովին ներկա կլինեն նաեւ հյուրեր Ռուսաստանից, Ղազախստանից, Վրաստանից, Ավստրալիայից, Սերբիայից եւ Բահրեյնից:
