Գյումրիում ռեկտորի եղբոր սպանության գործով դատական նիստն այսօր՝ սեպտեմբերի 4-ին, մեղադրյալ Արման Կատունյանի կնոջ ցանկությամբ դռնփակ է անցկացվում:

Գյումրիում NEWS.am-ի  թղթակիցը հաղորդում է, որ Շիրակի մարզի ընդհանուր իրավասության դատարանում այսօր վկայություն է տալիս Արման Կատունյանի կինը: Վերջինս դատարանին խնդրեց, որ նիստը դռնփակ անցկացվի, քանի որ իր ընտանեկան կյանքին է վերաբերում: Դատավորը բավարարեց միջնորդությունը եւ բոլորին դուրս հրավիրեց նիստերի դահլիճից:

Կատունյանի կնոջ վկայությունից հետո հարցաքննվելու է մեղադրյալի գործընկերը՝ Արտակ Մանուկյանը:

Նշենք, որ ըստ մեղադրական եզրակացության՝ սպանության պատճառը խանդն է եղել:

Ավելի վաղ NEWS.am-ը հայտնել էր, որ Շիրակի մարզում hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել են Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով: Կասկածյալը` Արման Կատունյանը, ոստիկանություն էր ներկայացել ինքնակամ եւ խոստովանել մեղքը։

Կատունյանին մեղադրանք է առաջադրվել Քրեական օրենսգրքի 105-րդ հոդվածով (Հոգեկան խիստ հուզմունքի վիճակում կատարված սպանությունը) եւ 235-րդ հոդվածով (Ապօրինի կերպով զենք կրելը)։