Հայաստանում անհրաժեշտ է քայլեր ձեռնարկել, որոնք տնտեսական աճը մարդկային զարգացման կվերածեն: Այս մասին սեպտեմբերի 4-ին կայացած ասուլիսում հայտարարեց տնտեսագետ, «Այլընտրանք» հետազոտական կենտրոնի տնօրեն Թաթուլ Մանասերյանը:
Նրա խոսքով, 4% տնտեսական ակտիվությունը վատ չէ Հայաստանի համար, բայց բավարար չէ: «Մենք պետք է ճիշտ օգտագործենք ոչ միայն տնտեսական, այլեւ բնակչության մասնագիտական պոտենցիալը: Հարկավոր է քայլեր ձեռնարկել՝ մեր արտադրողների համար ավելի լայն շուկաներ գտնելու համար, ինչը նույնպես կնպաստի աշխատատեղերի ստեղծմանը, տնտեսության զարգացմանը»,- նշեց Մանասերյանը:
Հարցին, ո՞ր ոլորտների հաշվին է Հայաստանում տնտեսական աճ արձանագրվել, Մանասերյանը պատասխանեց. «Հիմնականում գյուղատնտեսության, ծառայությունների եւ այլ ոլորտների հաշվին: Բայց ավելի կարեւոր է տարբերություն տեսնել տնտեսական աճի եւ մարդկային զարգացման միջեւ»,- նշեց նա:
Տնտեսագետը նաեւ հավելեց, որ զարգացած երկրներում քայլեր են ձեռնարկվում, որոնք տնտեսական աճը վերածում են մարդկային զարգացման: «Այսինքն՝ մեզ մոտ սոցիալական տարրը կարծես բավականաչափ չի գնահատվում, տնտեսական աճը չի արտացոլվում բնակչության կենսամակարդակի վրա: Հայաստանում երկնիշ տնտեսական աճի պայմաններում նույնպես դժգոհություն կար, քանի որ մարդիկ չեն զգում այդ աճը»,- հավելեց Թաթուլ Մանասերյանը:
