Լոռու մարզի Պաղաղբյուր համայնքի դպրոցն այս տարի առաջին դասարանցի չի ունեցել, ավելին, դպրոցը հայտնվել է փակման վտանգի առջեւ։
«Մեր դպրոցի հարցը լուծարման է դրված, մարզպետի հետ գրել ենք նախարարին, բայց պատասխան դեռ չի եկել: Ուզում են միացնեն Ձյունաշողին: Աշակերտների թիվը քիչ է, տեսնենք` ինչ է լինելու, դեռ պարզ չի»,- մեզ հետ զրույցի ժամանակ նշեց գյուղապետ Արուսյակ Դումիկյանը:
Նրա խոսքով` դպրոցի աշակերտների թիվը 3-5 է: Մինչդեռ տարիներ առաջ աշակերտների թիվը 30-ից ավելի է եղել։ Չնայած երեխաների չափազանց փոքր թվին, գյուղապետը կարծում է, որ դպրոցը պետք է շարունակի գործել:
«Սահմանամերձ գյուղ է, մեկ երեխա էլ լինի, պետք է աշխատի դպրոցը: Էդ երեխեն ինչո՞վ է մեղավոր, որ էս գյուղում է ծնվել: Ես կտրուկ դեմ եմ լուծարմանը: Մենք սահմանամերձ գյուղ ենք,..սահմանամերձ, էն էլ ինչ սահմանամերձ… Երկու քայլ է ընդամենը: Վրաստանի հետ ենք սահմանակից, Վրաստանի գյուղ ա, բայց ադրբեջանցիներ են ապրում: Ահռելի գյուղ ա»:
Հարևան Ձյունաշողը 7 կմ հեռավորության վրա է գտնվում: Գյուղապետի խոսքով՝ դպրոցը փակելու դեպքում գյուղի երեխաներն ուղղակի չեն գնա Ձյունաշող:
«Խնդիր է առաջնալու գյուղում, ծնողները չեն մնալու գյուղում, բողոքում են, չեն ուզում, որ երեխեքը գնան էն գյուղ: Աղջիկ երեխեք, հեռու գյուղ ա, սար տեղ ա… Էդպես էլ անգրագիտություն է տարածվելու գյուղում»,- նշում է գյուղապետը,-դպրոցը եթե փակեն, վարչության պետին էլ եմ ասել, ծնողներն ասել են՝ գնալու ենք գյուղից: Գնալու են էնտեղ, որտեղ դպրոց կա: Հետզհետե գյուղը փլուզվելու է…»:
