Գերմանիան չի ցանկանում խոստովանել Հայոց ցեղասպանության մեջ իր սեփական դերը: Այս մասին գրել է շվեդական Politiken պարբերականը:
Հոդվածի համաձայն, երկար ժամանակ Գերմանիան չէր ցանկանում ճանաչել Հայոց ցեղասպանությունը, քանի որ չէր ուզում փչացնել Թուրքիայի հետ հարաբերությունները: Իսկ գուցե նաեւ այն պատճառով, որ չէր ցանկանում հիշել սեփական դերն ու պատասխանատվությունը:
«Առաջին համաշխարհային պատերազմի ժամանակ Գերմանիան Թուրքիայի դաշնակիցն էր: Գերմանացի սպաները ծառայում էին օսմանյան ռազմական ոստիկանությունում, դիվանագետներն ու քաղաքական գործիչները շրջում էին երկրում: Ոմանք հետեւում էին տեղահանություններին, ոմանք՝ նաեւ մասնակցում դրանց: Բայց մի քանիսն էլ գրում էին հայրենիք՝ Գերմանիային կոչ անելով միջամտել:
Իսկ ռեյխսկանցլեր Թեոբալդ ֆոն Բետման-Հոլվեգը հայտարարեց. «Մեր միակ նպատակը Թուրքիային մինչեւ պատերազմի վերջ մեր կողքին պահելն է, իսկ հայերի հետ ինչ լինում է՝ թող լինի»:
Բանավեճեր են ծավալվում այն մասին, թե ինչու Գերմանիան մինչեւ հիմա չի ճանաչել, որ տեղի ունեցածը ցեղասպանություն էր, ինչպես դա արեց, օրինակ, Ֆրանսիան: Հարաբերությունները փչացնելու վախի՞ց, թե՞ սեփական դերը չհիշելու ցանկությունից: Քննարկումները կրկին աշխուժացել են»,- ասված է հոդվածում:
