Հաշվի առնելով այն առանձնահատկությունը, որ Եվրասիական տնտեսական միության անդամ դառնալը բխում էր Հայաստանի ռազմավարական շահերից, Հայաստանը պատրաստ է առավելագույնս զարգացնել Եվրամիության հետ իր հարաբերությունները այն պարտավորությունների շրջանակներում, որոնք չեն հակասում այդ ինտեգրացիոն գործընթացներին։ Այս մասին BBC-ի Ռուսական ծառայությանը տված հարցազրույցում հայտարարել է ՀՀ արտգործնախարար Էդվարդ Նալբանդյանը՝ պատասխանելով հարցին, թե Հայաստանի համար փակ է արդյոք Եվրամիությանը ինտեգրվելու ուղին։
Նախարարը հիշեցրել է, որ Հայաստանը ԵՏՄ անդամ է, իսկ ԵՄ դեպքում խոսքը անդամակցության մասին չի եղել։ «Դրանք տարբեր դասեր են։ Մենք կոնկրետ միջազգային տնտեսական միության անդամ ենք, որը Հայաստանի համար շատ կարեւոր որոշակի առավելություններ եւ միեւնույն ժամանակ պարտավորություններ է տալիս։ Այդ պատճառով, հաշվի առնելով դա, մենք կզարգացնենք մեր հարաբերությունները մյուս բոլորի հետ»,- ընդգծել է Էդվարդ Նալբանդյանը։
