Թուրքիայի հայ համայնքը ցանկանում է, որ երկրի կայունությունը վերականգնվի, արյունահեղությունը դադարեցվի: NEWS.am-ի թղթակցի հետ զրույցում նման կարծիք հայտնեց Ստամբուլի հայկական «Ժամանակ» թերթի խմբագիր Արա Գոչունյանը՝ անդրադառնալով Թուրքիայի հայտարարություններին, թե հայերն օգնում են քրդերին:
«Թուրքիայի հայ համայնքը միանում է հասարակության ջախջախիչ մեծամասնության միասնական կեցվածքին, որն ուզում է երկրում համերաշխություն տիրի եւ բնականոն զարգացումներ ընթանան: Երբ Թուրքիայում մթնոլորտը շիկանում է, հասարակության մի անպատասխանատու զանգված արհեստականորեն օրակարգ է բերում «Հայոց» անունը, մեղադրանքներ հնչեցնում: Սա մեզ համար անսպասելի բան չէ, կարծես թե ժառանգական է դարձել հասարակության այդ մասի համար»,- ասաց Արա Գոչունյանը:
Նա նշեց, որ հենց այս առիթով էլ Արամ արքեպիսկոպոս Աթեշյանը նամակ ուղարկեց վարչապետին եւ միեւնույն ժամանակ էլ զեկույցով հանդես եկավ՝ բացառելով վարկածը, թե հայ համայնքը կապ ունի Թուրքիայում տիրող իրավիճակի եւ ահաբեկչական գործողությունների հետ:
«Ճգնաժամային մթնոլորտ չկա, հայ համայնքի բնականոն կյանքը շարունակվում է եւ բոլորը սպասում են, որ արյունահեղությունը մեկ ժամ առաջ դադարեցվի, նոյեմբերի 1-ին կայանալիք ընտրություններից հետո էլ ամեն ինչ հանդարտվի»,- ավելացրեց նա:
Հիշեցնենք, որ հունիսի 7-ին Թուրքիայում կայացած խորհրդարանական ընտրություններից հետո լարվել են թուրք-քրդական հարաբերությունները: