Թուրքիան մեծ աշխարհաքաղաքական հավակնություններ ունեցող երկիր է, որը դուրս է գալիս իր երկրի տարածքներից: Անկասկած, Ադրբեջանը Թուրքիայի համար կարեւոր դաշնակից ու գործընկեր է տարածաշրջանում, ուստի մենք չգիտենք, թե Ադրբեջանն ինչ ձեւաչափով թուրքական ռազմաբազա կբացի Նախիջեւանում: Այս մասին հայտարարել է «Նացիոնալնայա օբորոնա» («Ազգային պաշտպանություն») ամսագրի գլխավոր խմբագիր Իգոր Կորոտչենկոն, գրում է «Գոլոս Արմենիի»-ն:
«Բոլոր դեպքերում, կարեւոր է հասկանալ, որ եթե մենք նայում ենք Հայաստանի եւ Ադրբեջանի ռազմական բյուջեների ցուցանիշներին, տեսնում ենք, որ անհամամասնությունն ակնհայտ է: Ադրբեջանն, ունենալով նավթային եկամուտներ, այս տարիներին հետեւողականորեն մեծացնում է իր ռազմական բյուջեն: Այս տեսանկյունից, եթե Նախիջեւանում թուրքական բազաներ տեղակայվեն, դա կբերի նրան, որ Բաքուն աշխարհաքաղաքական հավակնություններ կդրսեւորի, շարունակել իր զարգացումն այդ ուղղությամբ: Ի վերջո, դա կարող է դրդել Բաքվին ԼՂ խնդիրը լուծել ռազմական ճանապարհով, իր թիկունքում զգալով Թուրքիայի աջակցությունը»,- ասել է նա:
Կորոտչենկոյի խոսքով, Ադրբեջանում ՆԱՏՕ-ական ռազմաբազայի հայտնվելը Ռուսաստանում կարող են ընդունել որպես սպառնալիք ոչ միայն Հայաստանի, այլեւ Ռուսաստանի դեմ, քանի որ դրան կարող է հետեւել Ադրբեջանը ՆԱՏՕ-ի կազմ ընդգրկելու քաղաքականությունը: «Բացի այդ, թուրքական բազաները լավ պայմաններ կստեղծեն բոլոր տեսակի հետախուզական գործողությունների (էլեկտրոնային, օդային հետախուզություն) համար, իսկ այդ հետախուզության տվյալները կփոխանցվեն ՆԱՏՕ-ին, ինչը շոշափում է նաեւ Ռուսաստանի շահերը»,- ասել է նա:
