Բելգիայից ժամանած պատգամավորների պատվիրակությանը զարմացրել է Հայաստանում ու Լեռնային Ղարաբաղում հակաադրբեջանական քարոզչության բացակայությունը: Այդ մասին սեպտեմբերի 12-ին ՀՀ խորհրդարանում լրագրողներին հայտնել է Բրյուսելի խորհրդարանի պատգամավոր Սիմոնա Զյուսքինդը՝ մեկնաբանելով բելգիացի խորհրդարանականների պատվիրակության՝ Լեռնային Ղարաբաղ կատարած այցի արդյունքները:
«Մենք զարմացանք ՝ տեսնելով, որ այստեղ հակառակորդի նկատմամբ ատելություն չի քարոզվում ՝ հատկապես իմանալով, թե ինչպես են քաղաքացիական հասարակությանը վերաբերվում Ադրբեջանի իշխանությունները: Մեզ համար իհարկե դժվար կլինի իրավիճակը համեմատել Ադրբեջանի հետ (պաշտոնական Բաքուն արգելել է պատգամավորների մուտքը ՝ Լեռնային Ղարաբաղ կատարած նրանց այցից հետո –խմբ.): Այդուհանդերձ, մենք գիտենք, որ Ադրբեջանում քաղաքացիական հասարակության զգալի մասը բոլորովին չի կիսում իշխանությունների դիրքորոշումը»,- նկատել է Զյուսքինդը:
Սա չի նշանակում, որ պետք է շեշտել մի կողմի գերազանցությունը մյուսի նկատմամբ: Հակառակը ՝ պետք է փորձել բոլոր հնարավոր ճանապարհներով պահպանել Հայաստանի, Լեռնային Ղարաբաղի ու Ադրբեջանի հասարակությունների միջեւ կապերը: «Մենք պետք է հասկանանք, թե ինչպես կարելի է նպաստել երկխոսությանը »,- հայտարարել է նա:
Ինչպես հայտարարել է Բրյուսելի խորհրդարանի պատգամավոր Անդրե դե Բյուսը ՝ պատգամավորներն, այնուամենայնիվ, պատրաստ են հնարավորության դեպքում այցելել նաեւ Ադրբեջան, որպեսզի այնտեղ նույնպես տեսնեն հասարակության կյանքը ու ավելի լավ հասկանան, թե ինչ միջոցներով է հնարավոր հաշտեցում ապահովել: «Կողք կողքի խաղաղ ապրելը մարդկանց գլխավոր խնդիրն է»,- հավելել է նա: