Կոտայքի մարզի Զառ-Գեղաշեն ավտոճանապարհին նախօրեին բեռնատարի հրդեհի հետեւանքով հիվանդանոց տեղափոխված 10-ամյա երեխայի վիճակը կայուն ծանր է: Այս մասին NEWS.am-ի թղթակցին հայտնեցին «Ճառագայթային բժշկության եւ այրվածքների հանրապետական գիտական կենտրոն»-ից, որտեղ տեղափոխվել է երեխան:
«Մարմնի մակերեսի 40%-ն այրվել է, այս պահին վերակենդանացման բաժանմունքում է»,- ասացին հիվանդանոցից:
Կայուն ծանր է նաեւ մեքենայի վարորդի՝ 69-ամյա Սենիկ Գ.-ի վիճակը, իսկ 20-ամյա Մ. Գրիգորյանի վիճակը միջին ծանրության է:
Ավելի վաղ հայտնել էինք, որ սեպտեմբերի 13-ին Զառ-Գեղաշեն ավտոճանապարհի մոտակայքում` դաշտամիջյան հատվածում, այրվել է բեռնատար ավտոմեքենայի (վարորդ Սենիկ Գ.) շարժիչի հատվածը, վարորդի խցիկը, առջեւի անվադողը եւ թափքը (մոտ 1 քմ) եւ առջեւի մյուս անվադողը մասամբ: Հրդեհի հետեւանքով 69-ամյա Ս., 20-ամյա Մ. Գրիգորյանները եւ 10-ամյա Մ. Հ.-ն տարբեր աստիճանի այրվածքներով հոսպիտալացվել են:
