Խոշոր արտասահմանյան ներդրումները կարող են փոխել մեր երկիրը ներսից։ Այս մասին սեպտեմբերի 16-ին Կառավարությունում կայացած մամուլի ասուլիսի ժամանակ հայտարարեց «Ամերիա» ընկերությունների խմբի գործընկեր եւ կառավարման խորհրդատվական ծառայությունների ղեկավար Տիգրան Ջրբաշյանը։ Ասուլիսը նվիրված էր «Հայաստան» ներդրումային կոնֆերանսին, որը կընթանա 2016թ. սեպտեմբերին Նյու Յորքում Զարգացման ասիական բանկի եւ «Ամերիա» ընկերության, Հայաստանում 2011թ.-ից USAID ծրագրերով աշխատող Pragma ընկերության աջակցությամբ։
«Ներդրումային հնարավորություններ կան նաեւ այնտեղ, որտեղ բնական ռեսուրսներ չկան։ Շատ կարեւոր է կայուն իրավական դաշտ ձեւավորելը։ Մեզ մոտ նման բան ձեւավորվել է վերականգնվող էներգետիկայի ոլորտում, լավ նախադրյալներ կան ինդուստրիալ գյուղատնտեսություն զարգացնելու համար։ Օտարերկրյա ներդրումները շատ կարեւոր կլինեն առաջին հերթին նրանով, որ նրանք նոր բիզնես մշակույթ կբերեն»,- նշեց Ջրբաշյանը։