Աշխատանքային այցով Պեկինում գտնվող ՀՀ վարչապետ Հովիկ Աբրահամյանի գլխավորած կառավարական պատվիրակությունն այսօր՝ սեպտեմբերի 22-ին, Չինաստանում ՀՀ դեսպանատանը մասնակցել է ՀՀ անկախության 24-րդ տարեդարձին նվիրված տոնական ընդունելությանը: Միջոցառմանը ներկա են եղել Չինաստանում հավատարմագրված երկրների դիվանագիտական առաքելությունների, տարբեր գերատեսչությունների ղեկավարներ, հայ համայնքի ներկայացուցիչներ:
Դեսպանությունում վարչապետ Աբրահամյանը առանձնազրույց է ունեցել ՉԺՀ արտաքին գործերի փոխնախարար Չեն Գոպենի հետ: Կողմերը քննարկել են հայ-չինական փոխգործակցության խորացմանն ու ընդլայնմանն ուղղված մի շարք հարցեր:
Այսօր նախատեսված է վարչապետ Աբրահամյանի հանդիպումները ՉԺՀ պետական խորհրդի նախագահ (վարչապետ) Լի Քեցյանի եւ Չինաստանի քաղաքացիական ինժեներական շինարարական կորպորացիայի փոխնախագահ Սոն Յոնի հետ:
Նշենք, որ Հովիկ Աբրահամյանի գլխավորած պատվիրակության կազմում են ՀՀ տրանսպորտի եւ կապի նախարար Գագիկ Բեգլարյանը, ՀՀ էկոնոմիկայի նախարար Կարեն Ճշմարիտյանը, ՀՀ կառավարության աշխատակազմի ղեկավար-նախարարի առաջին տեղակալ Գուրգեն Դումանյանը, ՀՀ ֆինանսների նախարարի առաջին տեղակալ Պավել Սաֆարյանը, ՀՀ արտաքին գործերի նախարարի տեղակալ Սերգեյ Մանասարյանը, ՀՀ կենտրոնական բանկի նախագահի տեղակալ Ներսես Երիցյանը, պաշտոնատար այլ անձինք: