Եթե Մեհրիբան Ալիեւան եւ նրա ամուսինը՝ Ադրբեջանի նախագահ Իլհամ Ալիեւը, «ճիշտ տեղեկություն» չունեն երկրում քաղբաղտարկյալների առկայության մասին, ապա նրանք պետք է կարդան սեպտեմբերի 10-ին Եվրախորհրդարանի հավանությանն արժանացած բանաձեւը: Այս մասին իր խմբագրականում գրել է ամերիկյան հեղինակավոր «The Washington Post» պարբերականը՝ անդրադառնալով Փարիզում Ադրբեջանի ցուցահանդեսի ժամանակ տեղի ունեցած միջադեպին:
Նշենք, որ ցուցահանդեսի ժամանակ ֆրանսիացի լրագրողը Մեհրիբան Ալիեւային հարց է ուղղել իր երկրում քաղբանտարկյալների մասին, ինչին ի պատասխան Ալիեւան ասել է. «Դա ճիշտ չէ»:
Խմբագրականի հեղինակները հիշեցրել են, որ Եվրախորհրդարանի բանաձեւի համաձայն, Ադրբեջանում մարդու իրավունքների շուրջ իրավիճակը շարունակում է վատթարանալ, եւ երկրում, ընդհանուր առմամբ, վերջին տասը տարիներին ժողովրդավարության ամենամեծ անկումն է արձանագրվել ամբողջ եվրասիական տարածաշրջանում: «Մարդու իրավունքների առնչությամբ Ադրբեջանի հետ ԵՄ-ի երկխոսությունը զգալի առաջընթացի չհանգեցրեց»,- նշված է հոդվածում:
Ավելին, բանաձեւի ընդունումից հետո Ադրբեջանի կառավարությունը չեղարկեց Եվրահանձնաժողովի պատվիրակության ծրագրված այցը, որը պետք է քննարկել Բաքվի հետ ռազմավարական գործընկերության հարցը:
«Պարոն Ալիեւը երկար ժամանակ կարծում էր, որ կարող է տանը ճնշել այլախոհությունը՝ հետ մղելով արտաքին քննադատությունը: Նա միլիոնավոր դոլարներ վատնեց՝ արտասահմանում բարի կամքի ջանքերի համար: Միլիոնավոր դոլարներ էլ ծախսվեցին այս տարի Բաքվում անցկացված Եվրոպական խաղերի համար, որոնց ընթացքում մարզիկներն անտարբերությամբ անտեսեցին մարդու իրավունքների խախտումները: Սակայն պարոն Ալիեւը չի կարող հավերժ այդպես շարունակել: Տիկին Յունուսի եւ նրա ամուսնու՝ Արիֆի, ինչպես նաեւ տիկին Իսմայիլովայի հանդեպ սարսափելի վերաբերմունքը լայն արձագանք գտավ ամբողջ աշխարհում եւ հնարավոր չի լինի թաքցնել Փարիզում նորաձեւ ֆոտոցուցահանդեսների քողի ներքո»,- ամփոփել են հեղինակները:
