Հայաստանի վարչապետ Հովիկ Աբրահամյանն այսօր՝ սեպտեմբերի 28-ին, կրկին այցելել է Արարատի մարզ:
NEWS.am-ի տեղեկություններով՝ վարչապետն այցելել է խաղողի մթերման գործարաններ, ծանոթացել մթերման գործընթացին:
Նշենք, որ Հովիկ Աբրահամյանին ուղեկցում են ՀՀ գյուղատնտեսության նախարար Սերգո Կարապետյանը եւ Արարատի մարզպետ Ռուբիկ Աբրահամյանը: Նրանք եղել են նաեւ ԱԺ պատգամավոր Կարո Կարապետյանի՝ «Յուվեցի Կարոյին» պատկանող գործարանում:
Հիշեցնենք, որ մի քանի օր առաջ գյուղացիները խաղողի բերքով բեռնված ավտոմեքենաներով փակել էին մայրուղին եւ դժգոհում էին, որ Մասիսի «Նոյ» գործարանը տարբեր պատճառաբանություններով հրաժարվում է մթերել խաղողը: Հավաքվածներին այդ օրն այցելել էր վարչապետը, որի հորդորներից հետո միայն ճանապարհը բացվել էր:
Նշենք, որ 2015թ. սեպտեմբերի 25-ին ՀՀ կառավարության նիստին գյուղատնտեսության նախարար Սերգո Կարապետյանը տեղեկացրել է, որ խաղողի մթերման աշխատանքներն ընթացքի մեջ են: Նա ասել է, որ հանրապետությունում այսօր ունենք 49 մթերող կազմակերպություններ, որոնցից 32-ում արդեն մթերման աշխատանքները սկսված են: Նա վստահեցրել է, որ թեեւ նախորդ տարվա համեմատ առաջարկը պահանջարկից մեծ է, բայց անկախ ամեն ինչից իրենք մթերումները նորմալ անցկացնելու են:
