Մինսկի խումբը կոնկրետ գնահատականներ չի տալիս հայ-ադրբեջանական լարվածության պատճառների վերաբերյալ։ Այս մասին այսօր՝ սեպտեմբերի 29-ին, լրագրողներին ասաց ՀՀ պաշտպանության նախարարությանն առընթեր Հանրային խորհրդի նախագահ Գեղամ Հարությունյանը՝ հավելելով, որ Մինսկի խումբը պետք է հստակ նշի նախահարձակ կողմին։

«Մինսկի խմբից հիմնավորված բողոքներ կան, քանի որ իրավիճակի մասին նրանց կողմից կոնկրետ գնահատականներ չեն հնչում, Մինսկի խումբը պետք է հստակ նշի, թե ով է նախահարձակ կողմը։ Միայն զսպվածության կոչերով է հանդես գալիս, մի կողմից էլ հասկանալի է, քանի որ Մինսկի խումբը միջնորդական առաքելություն ունի և պետք է չեզոք դերակատարություն ունենա»,-ասաց Գեղամ Հարությունյանը՝ հավելելով, որ հասունացել է Ադրբեջանի նկատմամբ պատժիչ գործողությունների կիրառման պահը։

Ավելի վաղ NEWS.am-ը հայտնել էր, որ սեպտեմբերի 25-ին ժամը 17:30-ի սահմանում, ադրբեջանական զինուժի կողմից TR-107 կայանքներից հրթիռահրետանային արկակոծման էր ենթարկվել ՊԲ-ի հյուսիս-արեւելյան ուղղությամբ տեղակայված զորամասերից մեկի պահպանության տեղամասը, ինչի հետեւանքով զոհվել էին ՊԲ զինծառայողներ Նորայր Միքայելի Խաչատրյանը (ծնված 1995թ.), Ռոբերտ Սուրենի Մկրտչյանը (ծնված 1995թ.), Հարութ Մաքսիմի Հակոբյանը (ծնված 1997թ.)  եւ Կարեն Գեւորգի Շահինյանը  (ծնված 1997թ.): Կա 16 վիրավոր:

Արցախի նախագահ Բակո Սահակյանի հրամանագրերով զոհված զինծառայողները հետմահու պարգեւատրվել են «Մարտական ծառայություն» մեդալով: