Գողության համար պատժի կրումից խուսափելու համար Բաքու փախած Վահան Մարտիրոսյանը, նրա կինն ու երեխան ապաստան են ստացել եւ մտադիր չեն որեւէ այլ տեղ մեկնել:
Ինչպես հաղորդում է Minval.az-ը, այս մասին տեղեկացրել է իրավապաշտպան Նովելա Ջաֆարօղլուն:
Նա հավելել է, որ մանրամասն տեղեկություններ չի հաղորդում հայ ընտանիքի մասին՝ խուսափելու համար Հայաստանից, ինչպես նաեւ Ռուսաստանից եւ այլ երկրներից եկող սադրանքներից: Ջաֆարօղլուն հավելել է, որ Մարտիրոսյանների ընտանիքի վիճակի մասին մտահոգվելու առիթ չկա, ինքը պարբերաբար հանդիպում կամ զանգահարում է նրանց: «Փախստականները» հաճախ են զբոսնում Բաքվում: Վահան Մարտիրոսյանը չի թաքցնում, որ Ադրբեջանն իրեն դուր է գալիս եւ երկիրը լքելու ծրագրեր չունի:
Հիշեցնենք, որ Վահան Մարտիրոսյանը Բաքվում է հայտնվել՝ խուսափելով Հայաստանի իրավապահ մարմիններից՝ գողության համար:
