2015թ.-ին Հայաստանում համացանցից օգտվելու ցուցանիշների աճը կտրուկ դանդաղել է: Այս մասին այսօր՝ սեպտեմբերի 30-ին, լրագրողներին ասաց մեդիափորձագետ Սամվել Մարտիրոսյանը:
«Սա իր տրամաբանական բացատրությունը ունի, քանի որ նախորդ տարիներին Հայաստանը լրացնում էր այն բացը, որը ձեւավորվել էր «ԱրմենՏելի» մենաշնորհի ժամանակահատվածում: 2008-2010 թթ Հայաստանը փաստացի գտնվում էր ցանցից դուրս, օգտատերերի քանակը շատ քիչ էր, հիմա եկել ենք այն վիճակին, որ մոտավորապես բնակչության կեսն օգտվում է համացանցից: Հայաստանի համար սա մեծ ցուցանիշ է, ԱՊՀ տարածքում նույնպես, բայց միջազգային ցուցանիշներով մենք հետ ենք մնում, քանի որ կան երկրներ, որտեղ օգտագործման ցուցանիշը 80-90 տոկոսի է հասել»,-ասաց նա:
Սամվել Մարտիրոսյանը նշեց, որ համացանցը Հայաստանում հիմնականում շարունակում է մնալ շփման եւ տեղեկատվության տարածման միջոց եւ շատ ավելի քիչ է օգտագործվում, որպես տնտեսական, կրթական տիրույթ: