2015թ. սեպտեմբերին Ադրբեջան փախած՝ քրեական գործով հետապնդվող Վահան Մարտիրոսյանի դեպքից հետո, նմանատիպ դեպքերի կրկնությունը կանխելու նպատակով ՀՀ գլխավոր դատախազ Գեւորգ Կոստանյանը դատախազներին հանձնարարել է խստացնել քրեապես հետապնդվող, սակայն ազատոթյան մեջ գտնվող քաղաքացիների նկատմամբ վերահսկողությունը։
Այսօր սեպտեմբերի 30-ին, լրագրողների հետ զրույցում ՀՀ գլխավոր դատախազն ասաց, որ իր հանձնարարությամբ դատախազները պետք է ապահովեն, որպեսզի քննիչները կարողանան վերցնել ցանկացած անձի անձնագիրը, ում նկատմամբ որպեսզ խափանման միջոց է ընտրվել չհեռանալու մասին ստորագրությունը, որպեսզի նրանք չկարողանան լքել ՀՀ տարածքը։ Այնուամենայնիվ, Գևորգ Կոստանյանն ընդգծեց, որ անձնագիրը վերցնելն օրենքով չի սահմանվում, և դա յուրաքանչյուր քննիչի որոշումը պետք է լինի։
«Իրավական ակտով պարտադիր նման պայման չի սահմանում օրենքը և դա գործը քննող սուբյեկտը , նախաքննություն իրականացնող քննիչը, պետք է հասկանա՝ արդյոք նպատակահարմար է անձնագիրը վերցնել, թե ոչ, որովհետև ֆորմալ պարտավորություն որևէ քննիչ չունի»,-ասաց Գևորգ Կոստանյանը։
Ավելի վաղ հայտնել էինք, որ գողության մեջ մեղադրվող, կնոջ և երեխայի հետ Հայաստանից հեռացած և Բաքվից քաղաքական ապաստան խնդրած Վահան Մարտիրոսյանի նկատմամբ միջպետական հետախուզում է հայտարարվել։
