Լոռու մարզի Կուրթան գյուղում սպանված 16-ամյա Վարդան Գեւորգյանի հայրը պնդում է, որ ինքը չի հրկիզել որդու սպանության մեջ մեղադրվողի տունը: Այս մասին NEWS.am-ի թղթակցի հետ զրույցում ասաց Կուրթանի գյուղապետ Մհեր Գեւորգյանը, որը դեպքից հետո զրուցել էր սպանվածի հոր հետ:

«Մենք միասին ենք ոստիկանություն գնացել, սկզբում խմած էր եւ ասաց, որ հնարավոր է՝ ինքը հրկիզած լինի տունը: Սակայն երբ սթափվեց, ասաց, որ ինքը մենակ ապակիներն է կոտրել, տան հրկիզելու հետ կապ չունի: Հարեւաններն էլ են ասում, որ ինքն ապակիները կոտրել է եւ հեռացել»,- ասաց գյուղապետը՝ նշելով, որ ապակիները կոտրվել են ժամը 23:00-ի սահմաններում, մինչդեռ տունը հրկիզվել է ժամը 03:00-ին մոտ:

Գյուղապետը հայտնեց նաեւ, որ Վարդան Գեւորգյանի հայրը տեղյակ չէ նույնիսկ, թե իրեն ինչ մեղադրանք է առաջադրվել:

Հիշեցնենք, որ ըստ Քննչական կոմիտեի՝ տեղեկացավ, որ Վարդան Գեւորգյանի հորը՝ Խ. Գեւորգյանին մեղադրանք է առաջադրվել http://news.am/arm/news/286195.html ՀՀ քրեական օրենսգրքի 34-185-րդ հոդվածի 3-րդ մասի 1-ին կետով:

Պարզվել է, որ սեպտեմբերի 12-ին Խ. Գեւորգյանն իրավապահ մարմիններին է ներկայացել ինքնակամ եւ հայտնել, որ համագյուղացի Սեյրան Գեւորգյանի կողմից  օգոստոսի 28-ին իր անչափահաս որդուն սպանելու կապակցությամբ, վրեժխնդիր լինելու շարժառիթով, ալկոհոլի ազդեցության տակ ջարդել է Ս.Գեւորգյանի հայրական տան պատուհանները, որից հետո այրված շորի կտորներ տուն նետելու միջոցով հրկիզել է տանը եղած գույքն ու հեռացել:

Նշենք, որ սպանության մեջ մեղադրվող Սեյրան Գեւորգյանի ընտանիքը Կուրթանից հեռացել է, այժմ բնակվում է Վանաձոր քաղաքում: Այնուամենայնիվ, կրքերն այս գյուղում չեն հանդարտվում: Օրեր առաջ էլ հրդեհել էին մեղադրյալի ընտանիքի տունը:

Հիշեցնենք, որ 2015թ. օգոստոսի 28-ին որովայնի շրջանում ծակած-կտրած վերքերով Ստեփանավանի բժշկական կենտրոն էր տեղափոխվել Կուրթան գյուղի բնակիչ, 16-ամյա Վարդան Գեւորգյանը, որը հվանդանոցի ճանապարհին մահացել էր:

Սպանությունը կատարելու կասկածանքով նույն օրը ձերբակալվել էր Կուրթան գյուղի բնակիչ Սեյրան Գեւորգյանը: Նա խոստովանել էր, որ դեպքի օրը՝ օգոստոսի 28-ին՝ ժամը 20:00-ի սահմաններում, ինքն է իր կողմից օգտագործվող դանակով հարվածել Վարդան Գեւորգյանին:

Սեյրան Գեւորգյանին մեղադրանք է առաջադրվել Քրեական օրենսգրքի 104-րդ հոդվածի 1-ին մասով: Նա կալանավորված է:

Սեյրան եւ Վարդան Գեւորգյանը բարեկամներ էին, բնակվում էին նույն թաղամասում: