Ես առհասարակ փոխհատուցումների եւ սուբսիդավորումների կողմնակից չեմ, սակայն դեմ չեմ արտահայտվել այդ որոշմանը։ Այս մասին հոկտեմբերի 1-ին լրագրողների հետ զրույցում ասաց էկոնոմիկայի նախարար Կարեն Ճշմարիտյանը՝ մեկնաբանելով ՀԷՑ-ի եւ Կառավարության կողմից էլեկտրաէներգիայի սակագնի սուբսիդավորման մասին ՀՀ վարչապետի հայտարարությունը։
Նախարարի խոսքով՝ ինքը սուբսիդավորման համակարգի մանրամասներին տեղյակ չէ, սակայն ամեն բան պարզ է. «Առհասարակ ես փոխհատուցումների եւ սուբսիդավորումների կողմնակից չեմ, սակայն դեմ չեմ արտահայտվել այդ որոշմանը, քանի որ երկրում կա սոցիալական խնդիր, եւ փոքր ձեռնարկությունները նույնպես կարող են տուժել»։
Այն դիտարկմանը, թե նա չի կարծում արդյոք, որ հիմնավորված սակագինն ավելի կարեւոր է, քան սուբսիդավորումը, Ճշմարիտյանը պատասխանեց, որ ինքը կասկածի տակ չի դնում «Deloitte & Touche» խորհրդատվական ընկերության աուդիտի արդյունքները։ «Ես աուդիտի եզրահանգումների վերաբերյալ կասկածներ չունեմ, այն որ սակագնի բարձրացումը հիմնավորված է։ Մարքսի կրեդոներից մեկը հետեւյալն էր՝ կասկածիր ամեն ինչին։ Սակայն սա այդ դեպքը չէ։ Պետք է հավատալ, որ «Deloitte & Touche»-ը շատ բարձր որակավորված մասնագիտացված հնարավորություններ ունի։»
Հիշեցնենք, որ ավելի վաղ NEWS.am-ը հայտնել էր, որ «Տաշիր» ընկերությունների խումբը պատրաստակամություն է հայտնել իր անձնական միջոցների հաշվին մինչև 2016թ. օգոստոսի 1-ը Կառավարության հետ հավասար հիմունքներով փոխհատուցել սակագների տարբերությունն ամսական մինչև 250 կիլովատտ էլեկտրաէներգիա օգտագործող բնակչության և փոքր բիզնեսի համար: Զարգացման հետագա պլանների մեջ է մտնում հակաճգնաժամային ծրագրի ներդրումը՝ ընկերության ֆինանսական գործունեության օպտիմալացման եւ «Հայաստանի էլեկտրական ցանցեր» ՓԲԸ-ի ֆինանսա-տնտեսական վերահսկողությունն ուժեղացնելու նպատակով։ Նախատեսվում է իրականացնել նաեւ բաշխիչ ցանցերի սարքավորումների փուլային արդիականացում։
