Նոր Նորքի 1-ին զանգվածի շենքերից մեկի 12-րդ հարկից հոկտեմբերի 1–ին իրեն նետելու միջոցով ինքանասպանություն գործած 27-ամյա երիտասարդը օրեր առաջ երակները կտրելու միջոցով կրկին ինքնասպանության փորձ էր արել, սակայն հարազատներին հաջողվել էր փրկել նրան: NEWS.am-ի հետ զրույցում այս մասին պատմեցին նույն շենքի բնակիչները։
Նրանց խոսքով` Աշտարակում բնակվող երիտասարդն ընտանիքի հետ հյուր էր եկել հորաքրոջ տուն, եւ հենց այդ ժամանակ էլ նետվել է բնակարանի պատուհանից:
«Երեկոյան կողմ էր, բարձր գոռոցներ լսեցինք, դուրս եկանք, տեսանք՝ ընկած էր ծառի վրա: Ներքեւ իջած հարազատները, լացելով պատմում էին, որ ներս է մտել, իրենց բարեւել եւ վազել, իրեն գցել է պատուհանից»,-ասացին շենքի բնակիչները:
Հարեւանները նաեւ պատմեցին, որ երիտասարդը հիվանդ է եղել, 5 տարի ապրել ու բուժման կուրս է անցել Ֆրանսիայում, որտեղ բնակվում է քույրը։
Ավելի վաղ հաղորդել էինք, որ ոստիկանության Նոր Նորքի բաժին հոկտեմբերի 1-ին, ժամը 20:10-ի սահմաններում ահազանգ է ստացվել, որ Լվովյան փողոցի թիվ 5 շենքի բակում երիտասարդ տղայի դի կա: Փաստի առթիվ նյութեր են նախապատրաստվում:
