Հարավային Սուդանի նախագահ Սալվա Քիիրը հայտարարել է երկրում 18 նոր նահանգ ստեղծելու որոշման մասին, ինչը առաջ է բերել ապստամբների քննադատությունը։
Նախագահը նոր վարչական բաժանման մասին հայտնել է ուրբաթ երեկոյան՝ հեռուստատեսային ուղերձի ժամանակ։ Նախքան այդ երկրում կար 10 նահանգ։
Ապստամբների առաջնորդ, նախկին փոխնախագահ Ռիեք Մաչարը հայտարարել է, որ նախագահի որոշումը ապօրինի է եւ ապացուցում է, որ Քիիրը ընդդիմանում է օգոստոսին կնքած խաղաղության համաձայնագրին, որը ձեռք էր բերվել երկրում 2 տարի շարունակվող բախումներից հետո, գրում է BBC-ի Ռուսական ծառայությունը։
Ըստ այդ համաձայնագրի՝ ապստամբները 2 նահանգում պետք է նահանգապետի պաշտոն ստանան, սակայն դրանք ավելի փոքր վարչական միավորների բաժանելը կարող է վկայել այն մասին, որ նախագահը ցանկանում է պահպանել իր նշանակած անձանց, նշում են տեղական լրատվամիջոցները։