Ռուսաստանը չի դիտարկում առաջիկա ձմռանն ընդառաջ Ուկրաինային որեւէ ձեւաչափով վարկային միջոցներ տրամադրելու հնարավորությունը, այդ թվում նաեւ դեպի Եվրոպա տարանցման դիմաց կանխավճարի տրամադրումը, լրագրողներին հայտարարել է ՌԴ էներգետիկայի նախարար Ալեքսանդր Նովակը։
Ձմեռային գազային փաթեթում, որը Ուկրաինան, Ռուսաստանը եւ Եվրահանձնաժողովը ստորագրել էին Բրյուսելում սեպտեմբերի 25-ին, պայմանավորվածություն է ձեռք բերվել «Նավթոգազի» կողմից «Գազպրոմից» ընդամենը 2 միլիարդ խորանարդ մետր գազ գնելու մասին, եւ դա ՝ այն 500 միլիոն դոլար վարկի շնորհիվ, որ Ուկրաինան ստացել է Եվրահանձնաժողովի միջոցով։ Ընդ որում ռուսական կողմը զգուշացնում է, որ անօրինակ ցուրտ է լինելու եւ համարում է, որ «Նավթոգազը» եւս 5-7 միլիարդ խորանարդ մետր գազի կարիք կունենա եւ չի կարողանա գլուխ հանել առանց ռուսական գազի, փոխանցում է ՌԻԱ Նովոստին։
«Այդ հարցերը չեն քննարկվում։ Ինչպես գիտեք, հունիսի 16-ից «Գազպրոմը» կանխավճարային ռեժիմի է անցել, եւ դա ամբողջությամբ համապատասխանում է պայմանագրին, եւ այժմ, իրավիճակը հաշվի առնելով, «Գազպրոմը» գազ է մատակարարում միայն նախապես վճարված ծավալով։ Ոչ մի վարկավորման կամ գնումները կանխավճարի դիմաց ձեւակերպելու մասին խոսք լինել չի կարող »,- ասել է Նովակը՝ պատասխանելով այն հարցին, թե արդյոք քննարկվո՞ւմ է ռուսական գազ գնելու համար ՌԴ-ի կամ «Գազպրոմի» կողմից Ուկրաինային վարկային միջոցներ տրամադրելու հարցը։
Ռուս նախարարը բացասական պատասխան է տվել նաեւ այն հարցին, թե հնարավո՞ր է, որ «Գազպրոմը» «Նավթոգազին» կանխավճար տա Ուկրաինայի տարածքով դեպի Եվրոպա գազի տարանցման համար։ «Քանի որ կողմերը դատական գործընթացում են, այդ թվում նաեւ՝ տարանցման պայմանագրի վերաբերյալ, այդ թեման եւս չի քննարկվում »։