Ֆրանսիայի Մարսել քաղաքում, հոկտեմբերի 4-ին Հայոց ցեղասպանության 100-րդ տարելիցի միջոցառումների շրջանակներում մեկնարկել է 10-կմ վազք-մարաթոնը՝ «Վազել` հանուն հիշողության» նշանաբանով:
Թեթեւ ատլետիկայի եվրոպայի ռեկորդակիր Ռոբերտ Էմիյանի հովանու ներքո կազմակերպված մրցությանը մասնակցեցին մարաթոնների Ֆրանսիայի բազմակի չեմպիոն Էլոդի Նորմանդը, սամբոյի Եվրոպայի եւ Ֆրանսիայի եռակի չեմպիոն Արայիկ Մարգարյանը, էքստրեմ-սպորտսմեն Արա Խաչատրյանը, «Վազել` հանուն հիշողության» կազմակերպության եւ Մարսելի սպորտային մի շարք կազմակերպութունների ավելի քան 500 վազորդ` մարզահագուստներին կրելով «ոչ ցեղասպանության ժխտողականությանը» ուղերձը:
Վազքը մեկնարկեց 18-րդ դարում կառուցված Բորելի պալատի այգում տեղակայված հայկական խաչքարի մոտից: Մասնակիցները, անցնելով Մարսելի գլխավոր պողոտաներով եւ փողոցներով, Հին նավահանգստով, վերջնագիծը հատեցին նորակառույց Միջերկրականի պատմության «Մյուսեմ» թանգարանին հարող հրապարակում` վայր, ուր ժամանել էին 20-րդ դարի առաջին ցեղասպանությունից մազապուրծ եղած հայերը:
Մի քանի անվանակարգերում հաղթողներին մրցանակները հանձնեցին Բուշ-դյու-Ռոն դեպարտամենտի գլխավոր խորհրդի փոխնախագահ Մորիս Դինոսերան, Ֆրանսիայի ԱԺ պատգամավոր Հենրի Ժիբրայելը, Մարսելում ՀՀ հյուպատոս Սամվել Լալայանը, «Վազել` հանուն հիշողության» կազմակերպության պատվավոր նախագահ Պասկալ Շամասյանը, «Ֆրանսիայի հայ երիտասարդություն» կազմակերպության նախագահ Տիգրան Հարունյանը եւ այլոք:
Միջոցառմանը ներկա էին տեղական ինքնակառավարման մարմինների ընտրյալներ, հայկական եւ ֆրանսիական հասարակական կազմակերպությունների նախագահներ, լրագրողներ, բազմաթիվ երկրպագուներ:
Միջոցառումը լայնորեն լուսաբանվեց ֆրանսիական լրատվամիջոցների կողմից։