Իրանը պատրաստ է մեծացնել Հայաստանին մատակարարվող գազի ծավալները։ Այս մասին ասել է Իրանի գազ արտահանող ազգային ընկերության տնօրեն Ալի Ռեզա Քամելին։ Այս հայտարարությունն արվել էր հոկտեմբերի 4-ին Թեհրանում Հայաստանի էներգետիկայի նախարար Երվանդ Զախարյանի եւ Իրանի նավթի նախարար Բիժան Զանգանեի բանակցությունների ավարտին, հաղորդում է Press TV-ն։

Քամելիի խոսքով՝ դեպի Հայաստան գազատարը կարող է օրական ավելի քան 6 մլն խ/մ գազ մատակարարել, սակայն ներկայումս այդ հոսքը կազմում է 1 մլն խ/մ։ «Անհրաժեշտ ենթակառուցվածքների բացակայության պատճառով Հայաստանը չի կարող ամբողջ ծավալով օգտվել գազատարի թողունակությունից»,- ասել է նա։

Նշենք, որ հոկտեմբերի 4-ի հանդիպումից հետո Իրանի նավթի նախարարը հայտնել էր, որ երկու երկրները քննարկել են գազի մատակարարման հարցը։