Սիրիայի տարածքում Ռուսաստանի ռազմարշավը կարող է նավթի գների աճի պատճառ դառնալ, գրում է The Telegraph թերթը:
Ինչպես գրում է թերթը, նավթի գների անկումը, որը սադրել էին Սաուդյան Արաբիան, ՄԱԷ-ն, Քաթարն ու Քուվեյթը, բացասական ազդեցություն ունի Ռուսաստանի տնտեսության վրա: Եթե գների նվազման միտումը պահպանվի նաեւ հաջորդ տարի, ապա Ռուսաստանի բնակիչների մոտ «իրենց առաջնորդին ուղղված բազմաթիվ հարցեր կծագեն »:
Պարբերականը նշում է, որ Սիրիայի տարածքում օդային հարվածներ իրականացնելով, Ռուսաստանը փորձում է «տեղերով փոխվել ԱՄՆ-ի հետ», որն էլ իր հերթին է փորձում Մոսկվային սնանկության հասցնել:
Սիրիայում շարունակվող ռազմարշավը նպաստում է տարածաշրջանում լարվածության աճին ու ֆինանսապես ճնշում է Սաուդյան Արաբիային ու նրա դաշնակիցներին , որոնք աջակցում են սիրիական ընդդիմությանը: Նման պայմանները կարող են հանգեցնել նրան, որ Սաուդյան Արաբիան ստիպված կլինի կրճատել արդյունահանման ծավալները, ինչն էլ վերջին հաշվով կհանգեցնի նավթի գների աճին:
Սակայն թերթը նշում է, որ հնարավոր է՝ ապագայում Իրանը կփորձի ավելացնել նավթի արդյունահանումը: Եթե նման բան լինի ՝ գինը կնվազի: Պարբերականի կարծիքով, սա կարող է հանգեցնել Մոսկվայի ու Էր Ռիյադի կառավարությունների ֆինանսական ճգնաժամին, հայտնում է Gazeta.ru-ն: