Սուրիկ Խաչատրյանի որդու մասնակցությամբ «Սդղի գյոլ»-ում մայիսի 2-ին տեղի ունեցած ծեծկռտուքի գործով կալանավորված Դերենիկ Հակոբյանն այսօր՝ հոկտեմբերի 5-ին, գրավով ազատ է արձակվել: Այս մասին NEWS.am-ի հետ զրույցում ասաց նրա փաստաբան Արմեն Մելքոնյանը:
Նա նշեց, որ իր եւ մյուս պաշտպան Արմեն Խաչատրյանի միջնորդությունը դատարանը բավարարել է եւ Դերենիկ Հակոբյանին 1 մլն դրամ գրավով ազատ է արձակել: Քրեական հետապնդումը Դերենիկ Հակոբյանի նկատմամբ առայժմ չի դադարեցվել:
Ավելի վաղ Քննչական կոմիտեն հայտնել էր, որ 2015թ. մայիսի 2-ին՝ ժամը 17:00-ի սահմաններում, «Սդղի գյոլ»-ում տեղի էր ունեցել վիճաբանություն, որի ընթացքում մի խումբ անձանց կողմից բռնություն է գործադրվել Մուշեղ Զաքարյանի նկատմամբ։ Քննության տվյալներով՝ ՀՀ քաղաքացիներ Յուրի Մանուչարյանը, Դերենիկ Հակոբյանը մի քանի այլ անձանց հետ միասին հարվածներ են հասցրել Մ.Զաքարյանի մարմնի տարբեր մասերին՝ պատճառելով միջին ծանրության մարմնական վնաս։
Յուրիկ Մանուչարյանին եւ Դերենիկ Հակոբյանին հունիսի 12-ին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով, եւ նույն օրը քննիչը միջնորդություն է ներկայացրել դատարան՝ նրանց նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է։
Նշենք, որ քրգործի շրջանակներում կալանավորվել է նաեւ Սյունիքի մարզպետ Սուրիկ Խաչատրյանի որդին, որը 2 ամիս անց ազատ է արձակվել եւ նրա նկատմամբ քրեական հետապնդումը դադարեցվել է:
