Թուրքական դատարանն ամեն ինչ անում է Հրանտ Դինքի սպանության իրական հրահրողների եւ կազմակերպիչների բացահայտումը բացառելու համար: «Ազատություն» ռադիոկայանի հետ զրույցում հայտարարել է թուրք պատմաբան, պրոֆեսոր Հալիլ Բերքթայը: Նրա խոսքով, Դինքի սպանության գործով ձգձգվող դատական գործընթացը ֆարս չէ, բայց շատ մոտ է դրան։
«Այժմ էլ արտգործնախարարությունը պատասխան է հղում Մարդու իրավունքների եվրոպական դատարանին, որն այլ կերպ, քան մոլագարություն եւ խայտառակություն անվանել չի կարելի»,- ասել է նա:
Հրանտ Դինքի մյուս ընկերը՝ հրապարակախոս, «Բիլգի» համալսարանի դասախոս Մուրադ Բելգեն, ով 2005 թվականի սեպեմբերի 24-ին կայացած խորհրդաժողովի կազմկոմիտեի անդամն էր, նշում է, թե այդ խորհրդաժողովից հետո, Թուրքիայում զարմանալիորեն աճեց հետաքրքրությունը Հայաստանի եւ հայկական հարցի նկատմամբ:
«Թուրքիան խնդիր ունի իր պատմության հետ։ Այժմ Թուրքիայում իսկական մտավորականները որդեգրել են այն դիրքորոշումը, որ մենք պետք է ընդունենք Հայոց ցեղասպանությունը: Որքան բարձր է հնչում մեր տեսակետը, նույնքան ագրեսիվ են դառնում ցեղասպանությունը մերժողները, եւ մոտ ապագայում մենք իրավիճակի փոփոխություն ակնկալել չենք կարող»,- ասել է Բելգեն:
Հիշեցնենք, որ Մարդու իրավունքների եվրոպական դատարանը մեղավոր է ճանաչել Թուրքիային՝ ստամբուլահայ լրագրող, «Ակոս» թերթի գլխավոր խմբագիր Հրանտ Դինքի սպանությունը չկանխելու եւ սպանության բացահայտման ուղղությամբ հետաքննությունը նորմալ չկազմակերպելու համար։
Հրանտ Դինքը սպանությունից առաջ դատապարտվել էր տխրահռչակ 301 հոդվածով, որն էլ պարարտ հող էր նախապատրաստել նրա սպանության համար։ Սպանությունից հետո հայտնի դարձավ, որ Դինքի դեմ կազմակերպվող սպանության մասին տեղյակ է եղել թե’ ոստիկանությունը, թե’ ժանդարմերիան։
Թուրքիայում կարծես իմացել էին, որ Մարդու իրավունքների եվրոպական դատարանում Դինքի ընտանիքի հայցն՝ ընդդեմ Թուրքիայի, կբավարարվի, դրա համար էլ թուրքական իշխանություններն իրենց արդարացնելու համար հատուկ հայտարարություններով են հանդես եկել։
Օրինակ՝ Բաքու կատարած այցի ընթացքում Թուրքիայի նախագահը հայտարարել էր, թե Հրանտ Դինքի սպանությունը կանխելու համար պետությունը ոչինչ չի ձեռնարկել եւ օրեր անց նախագահական պալատ է հրավիրել Դինքի եղբորը։
Իր հերթին արդարացել է նաեւ արտգործնախարար Ահմեդ Դավութօղլուն՝ հայտարարելով, թե ինքը տեղյակ չի եղել եւ չի էլ ստորագրել Հրանտ Դինքի դեմ Մարդու իրավունքների եվրոպական դատարան պետության կողմից ուղարկած պաշտպանական ճառի տակ, որտեղ Դինքին համեմատել են նեոնացիստի հետ։
