Երկրի վրա գոյություն ունեցող կակտուսների մոտ 1/3-ը ոչնչացման եզրին է գտնվում։ Փշատերեւ բույսերը հայտնվել են մոլորակի ամենախոցելի բույսերի ցուցակում, հայտնում է Reuters-ը։
«Մենք զարմացել էինք՝ հայտնաբերելով, որ կակտուսների տեսակների այդքան մեծ թիվ տարբեր վտանգների է ենթարկվում»,- հայտարարել է հետազոտական խմբի ղեկավար Բարբարա Գոթչը։
Գիտնականները եկել են այն եզրակացության, որ ոչնչացման եզրին է գտնվում կակտուսների 1478 տեսակների 31 տոկոսը, գրում է Lenta-ն։
Այս բույսերի համար հիմնական վտանգները մարդածին են։ Դրանց թվում է օրինակ բույսերի ծովահենային վաճառքը կամ անապատային տեղանքում կենդանաբուծական ֆերմաների կառուցումը։ Մինչեւ 19 սմ երկարությամբ կակտուսները հատկապես գնահատվում են կոլեկցիոներների կողմից։
Հյուսիսային եւ Հարավային Ամերիկաներում, Չիլիում, Ուրուգվայում, Մեքսիկայում եւ ԱՄՆ-ում աճող կակտուսների մեծ մասը Կարմիր գրքում է հայտնվել։
